ەرمۇحان اتا، قارتتار ءۇيىنىڭ تۇرعىنى: 

اتا-اناسىنان بولەك تۇراتىن ورىستاردى كورگەندە جاعامدى ۇستاۋشى ەدىم. "سۇمدىق-اي، كۇيەۋىنىڭ اكە-شەشەسىن سىيلاماعان كەلىننىڭ، سوڭىنان ەرىپ اتا-اناسىنان بەزگەن بالانىڭ انا دۇنيەدە جازاسى بولار"، - دەپ ءوزىمدى ىشتەي جۇباتاتىنمىن. تاعدىر دەگەن قيىن ەكەن عوي. باسقا سالعان سوڭ كونەدى ەكەنسىڭ. ءبىر ۇيدە ومىرلىك جارىم، كىشى ۇلىم كەلىنمەن جانە ءۇش نەمەرەممەن تۇراتىن باقىتتى وتباسى بولدىق. 63 جاسىما دەيىن مەكتەپتە حيميا ءپانىنىڭ ءمۇعالىمى بولىپ قىزمەت ىستەدىم. سودان كوزىمدى شەل باسىپ، ءبىر جانارىمنان ايىرىلدىم. ءسويتىپ جۇمىستان قول ءۇزدىم. ءبىر جىل وتپەي، بايبىشەم اتى جامان دەرتتەن كوز جۇمدى. سول كۇننەن باستاپ كەرەكسىز ەكەنىمدى ءتۇسىندىم. بالام مەن كەلىنىم مەن ءۇشىن كۇندە كەرىسىپ جاتاتىن. بىر-ەكى رەت كەتىپ قالدى. ىشتەي ءبىلىپ ءجۇردىم. كەمپىرىمنىڭ جىلىن بەرگەن سوڭ، بالام: "كوكە، ۇيدە وتىرىپ زەرىگىپ جۇرگەنىڭىزدى بايقاپ ءجۇرمىن. اپامنىڭ ورنىن ەشكىم باسا المايدى، بىلەم. ءبىراق مەن ءبىر شەشىمىن تاپتىم. قارتتار ۇيىندە وزىڭىزبەن قاتار قۇرداستارىڭىز بار. ايتار اڭگىمەلەرىڭىز بولادى. ونىڭ ۇستىنە جاعداي دا جاسالعان ەكەن. ءبىز سىزگە بارىپ تۇرامىز. ۇيگە كەلىپ قوناق بولىپ تۇراسىز"، - دەپ اشىق ايتتى. اڭگىمەنىڭ سوڭىن تىڭدامادىم. بىردەن كيىمىمدى جيناپ، دايىندالا باستادىم. كوكىرەگىمدەگى كەرنەگەن وكسىكتەن بالاما ءتىل قاتا المادىم. ۇنسىزدىك. ءتۇس اۋا قارتتار ۇيىنە كەلدىك. قۇججاتاردى تىركەپ، سول جەردە قالدىم. مەنى تاستاپ كەتىپ بارا جاتقان بالاما: 
-مەن ومىردەن وتكەن سوڭ، قۇران وقىتىپ، سوڭعى ساپارعا شىعارىپ سالساڭدار بولدى، - دەدىم. قارا شاڭىراقتاعى عۇمىرىمنىڭ جالعاسىن قارتتار ۇيىندە جالعاسارىن ءومىر تۇگىلى تۇسىمە دە كىرمەپتى. شاريعاتتا پەندە سانالى تۇردە وزىنە قول جۇمساۋعا بولمايدى. ايتپەسە ولىمگە اسىعىپ تۇرامىن. ءومىرىڭ ماعىنالى بولسا، ۇزاق عۇمىر جاساعانعا نە جەتسىن؟! ال قارتتار ۇيىندە قاي كۇننىڭ ءوتىپ جاتقانىن دا بىلمەيسىڭ. ءقازىر مۇندا تىرىشىلىك جاساپ جاتقانىما ءۇش جىلدان استى. تىرىشىلىك دەيمىن-اۋ، ايتەۋىر جانباعىس. ايىنا ءبىر رەت بالام كەلىپ تۇرادى. ال كەلىنىم مەن نەمەرەلەرىمدى وسى جەرگە كەلگەلى بەرى كورمەدىم. مۇندا تيىسىنشە جاعداي جاسالعان. ءبىراق كوڭىلىڭ توق بولماسا، كويلەگىڭنىڭ كوك بولعانىنان نە پايدا؟!.... 

(ەرمۇحان اتا، كوڭىلى بوساپ، اڭگىمەسىنىڭ سوڭىنا دەيىن اياقتاي المادى...)

زاۋرەش سىپاتايەۆا